BROUHAHA

EVVIVA U LIBECCIU

O quant'ellu mi piace di parlà! Cù i parenti, l'amichi, i paesani è i furesteri chì m'amparanu sempre centinai d'affari interessanti... Sò cusì fattu chì adoru scambià qualchì parulluccia è s'ella vene di principià un cuntrastu puliticu o altru. Ma l'omi, una volta chì li cunoscu appena, sò quasi sempre ciò ch'hà da esce da a so bocca. Tandu, mi messu à parlà cù a natura.
Ùn pare forse micca da a l'uchjata primaticcia ma, o quant'è cose ch'ella sà ! Ogni culore palesa un sintimu cecu, una passione infiarata, una brama inzuccherata, un amore appena spuntatu... Ogni forma spantica un sapè anzianu, una bellezza senza età ne nome... Ogni mughju ci sveglia : u cantu di l'acelli inguantati da u calore di quellu chì ghjucherà abeternu à piattatella cù a luna, l'ira di u sciloccu chì vuleria supranà à a forza di u Libecciu. Questu hè u miò più vicinu cunsiglieru. Sempre stinza un orechja astuta per ascultà mi parlà ore è ore di a miò esistenza urdinaria. Li dicu tuttu, da anni hè u miò cunfidente. Pò quandu piglia fine a miò piccula lagnanza, mi risponde d'omu à omu. Mi fideghja l'ochji in l'ochji è cappia tuttu ciò chì pesa nant'à u so core di giovane vechjettu. M'insegna a strada chì ci vole à piglià. Sè sò cintu da strazii o affani, si mette à chjamà tutti i so amichi è tandu, l'alburu, u fiore è ancu u mare mi porghjenu una manu fraterna. L'alburu smaniata, a ceppa techja rimina i ghjamboni chì lampanu una chjama erghita à u fiore. Quellu face sventulà i so petali chì sparghjenu in l'aria veraniccia u so musculellu acetu chì si ne và à ciricà à cimiciccula di u mare. Tandu st'aghjona turchina s'assumiglia à u stadiu di Bastia : u turchinu sposa u biancu per u megliu è, à e volte anche per u peghju. S'intriccianu cum'è a morta è a scopa... Sulidarità ùn hè una parolla vana per a natura. È quand'elli si mettenu à festighjà ! Ohimella ! Parenu tuttu una banda di zitelli ch'anu e smaine quandu aspettanu à i rigali cascati da i nuli cù babbu natale è a so barba sciumosa. Ancu stancu è frustu da u pesu di l'ore, u Libecciu busca un energia maistrale per fà ci tutti ballà u quadrigliu nant'à a parochja. Eppò pussede un sensu di u spiritu tremendu. Ùn la sapite forse micca ma quandu soffia in timpesta, vole solu mette a nostra risa à u provu. In fine, u Libecciu ellu, ùn s'hè scurdatu di a Filetta è parla corsu ! Tandu, averete capitu megliu perchè mi piace tantu l'amicu Libecciu chì sciapa e fune...